Copyrights @ Journal 2014 - Designed By Templateism - SEO Plugin by MyBloggerLab

27/03/13

, , ,

‘Heroes’, en CulturaGalega.org

Hoxe apareceu un novo artigo da miña columna «Entre as viñetas», en CulturaGalega.org. Unha obra como El héroe, de David Rubín, merecía ser lida ao completo para ser debidamente comentada —xa que foi concibida como unha obra única, aínda que se tomase a decisión de dividila en dúas partes por cuestións prácticas—; confirmo a impresión de que gaña enteiros lida en conxunto. Moito se ten comentado xa esta novela gráfica (é unha forma de falar: a falta de aparato crítico no mundo do cómic segue a ser, como xa teño dito, o gran problema que toca resolver agora), mais esta é a miña pequena contribución; o seu título, Heroes.

Como na columna fago mención ao debatido —de novo, poñamos tal verbo entre aspas— asunto do termo «novela gráfica», aproveito a ocasión para divulgar este artigo que me pediron para o último número d’O Fanzine das Xornadas, que nestes días foi publicado en PDF na web oficial das Xornadas (o meu texto pode lerse tamén aquí individualmente). Creo que o concepto «novela gráfica» segue a ser moi nebuloso, mais coincido co artigo de David Rubín casualmente aparecido tamén hoxe na idea de que, sexa como for, só trouxo cousas boas para a banda deseñada.

16/01/13

, ,

‘Fugacidade’, en CulturaGalega.org

Despois dun pequeno lapso de tempo sen publicar, por causas diversas, hoxe hai un novo artigo da miña columna periódica «Entre as viñetas», en CulturaGalega.org. O texto, titulado Fugacidade, reflexiona sobre esa misteriosa conxunción de factores que converte en perfecta unha obra de arte nun momento determinado e que moitas veces —a maior parte delas— desaparece, e con ela a perfección artística, cando pasou ese momento. Algo que explicaría por que algunhas que foron consideradas «obras mestras de todos os tempos» hoxe poden parecernos bastante menos ca iso —non entro a dar exemplos; non se trata hoxe de polemizar—. Dígase de paso que a imaxe que se utilizou para ilustrar o artigo (responsabilidade do equipo de CulturaGalega.org) é precisamente a cuberta dun libro que pretendeu, nun afastado 1996, desmontar algúns canons preexistentes no mundo da BD, só que para facer outro novo, tan discutíbel (e en moitos sentidos tan inútil) como aquel.

A pesar de que non houbo novas columnas miñas nestes últimos meses, si que colaborei con CulturaGalega.org nalgúns dos seus artigos. Por exemplo, aparecen declaracións miñas no que fixeron con motivo do trixésimo aniversario do Carrabouxo e no balance cultural do ano 2012.